கடவுளின் நிறுவனம்

குடிப்பதற்கு ஓரளவு மதுவும்
கடிப்பதற்கு ஒரு துண்டு இறைச்சியும் கிடைத்துவிட்டால்
புணர்ச்சிக்கு வீடு திரும்பிவிடுகிறான் கவிஞன்
சமைப்பதற்கும் உறங்குவதற்கும்
சொந்தமற்ற நான்கு சுவர்களைக் கொண்டிருக்குமவன்
அதிலிருந்து வெளியேரும் நீண்ட கால்களால்
உலகத்தை விரித்துக்கொண்டு போகிறான்
அவன் கண்கள்செல்வச் செழிப்புள்ள
கருவூலங்களை ஊடுருவிச் சென்று
அப்பாலுள்ள நிலவை இலவசமாய்ப் பகிர்ந்து நிற்கிறது
கவிஞன் கரைமீது நடக்கும்போது
பசித்தவர்களின் பேரோசைகளையே கற்பிதம் செய்கிறான்
விளிம்பில் நின்று நிலத்தை அதட்டும் அவன் குரலால்
மிச்சமான பண்டங்கள் யாவும்
வெளியில் தெறித்து விழுகின்றன
அவன் சிரித்துக்கொள்கிறான்
இந்த கடவுளின் நிறுவனத்தில்
வெலை மறுத்தும் விசுவாசமற்றும் அவன் திரிவதுவேடிக்கையானது மட்டுமல்ல விபரீதமானதும்தான்
உழைப்பவர்கள் தங்கள் வயிற்றை காட்டும்போது
அந்தப் பைத்தியக்காரன் தற்கொலை செய்துகொள்ளும்படி
அவர்களுக்கு ஒரு ஆழ்ந்தபள்ளத்தாக்கையல்லவா
முன்மொழிகிறான்
அப்படித்தான் இரண்டு கை நிறைய
புளியவிதைகளைக் கொடுத்துவிட்டு
ஒரு இறக்குமதி பானத்தைக் கேட்டு அடம்பிடித்ததும்
சற்றே ஏமாற்றுக்காரனைப்போல் தென்படும் அவனுக்கு
நீங்கள் ஏதேனும் அறிவுரை கூற முயலும்போது
உங்களிடம் ஓரளவு மதுவும்
ஒரு துண்டு இறைச்சியும்
உபரியாக இருந்தால் தொலைத்துவிட்டுப் பேசுவதுதான்
சிறந்த உபாயம்
பிறகு அவனிடம்
உதவாக்கரைகளுக்காக
கடவுள் தன் நிறுவனத்தை திறந்து போடுவாரா
என்று கேளுங்கள்
போடமாட்டார் என ஒப்புக்கொள்வான்
-யவனிகா சீறிராம்


கடவுளின் நிறுவனம் என்ற தொகுப்பிலிருந்து

உன்னிடம் விடைபெற்றுக் கொண்ட
பின் உன் தோள்களில் உணர்ந்திருப்பாய்
என் நேசப் பறவைகளை
நான் வரும் போது அழைத்து வந்திருந்தேன்
என்னுடன் உன் நினைவுகளின்
அரூபத்தை
என் மனதில் துடிதுடித்து உயிர்த்தெழும்
என் உணர்வுகளை தின்று தீர்த்துக்
கொண்டிருக்கிறது உன் அருபம்
உன் மௌன புன்னகைகளை தானியங்களாக்கி
உணவிடு உன் அறையில் இருக்கும்
என் நேசப் பறவைகளுக்கு

இறுகும் அதிகாரத்தின் கைகள்

பாதி வெப்பமும் பாதி குளிர்ச்சியுமான
விசித்திர இயல்புடையது இந்நகரம்
அதிகரத்தினால் நிறைந்திருக்கிறது இந்நகரம்
அதிகாரம் இதுவரை எந்த நகரத்தையும்
வென்றதில்லை
அதன் ஆன்மாவை பிடித்து அதன் வளங்களை
உறிஞ்சி விடும் இயல்புடையது
விளையாட்டு பெரும் போராய்
உணரப்பட்டதில் அதிகாரத்திற்கு
பங்குண்டு
தேசதுரோகிகளின் பட்டியல் அதிகாரத்தினால்
தயாரிக்கபடுகிறது அது நீண்டதாயும்
முடிவற்றதாயும் இருக்கிறது
அதிகாரம் தேசியம் தேசியம் என்று
கத்திக் கொண்டே இருக்கிறது
அதிகாரம் தன்னை தக்க வைக்க
நகரெங்கும் படைகளை அனுப்புகிறது
படைகளால் கொல்லப்பட்ட உடல்கள்
நகர எல்லைகளில் குவிகின்றன
காணாமல் போன குழந்தைகளின் பெற்றோர்
இரவுகளை அழுதுகொண்டே கழிக்கிறார்கள்
படைகளால் வண்புணரப்பட்ட பெண்களின்
எண்ணிக்கை அதிகரித்துக் கொண்டேயிருக்கிறது
நகர வீதிகளில் தாய்மார்கள் தங்களையும்
வன்புணரும்படி அதிகாரத்திற்கு எதிராய்
கூக்குரலிடுகிறார்கள்
அதிகாரத்தின் கண்கள் அதை
காணாது முடிக்கொள்கின்றன
மனித உரிமை பற்றி
பேசுவது அதிகாரத்திற்கு பிடிப்பதில்லை
அதிகாரத்தின் மனசாட்சியை திருப்திபடுத்த பலரும்
சிறையில் அடைக்கப்படுகிறார்கள்
தூக்கிலிடபடுகிறார்கள்
அனைத்தும் சரியாக அதிகாரம்
உங்களை கனவு காணசொல்கிறது
அதிகாரத்தின் புனித வாய் உங்களை ஆசிர்வதிக்கிறது
"அவா அவா கடமையை அவா அவா செய்யுங்கோ"
அதிகாரத்தின் வளர்ப்பு நாய்கள் நகரில் அதிகம்
அவை ஜனாதிபதியாகவும், பிரதம மந்திரியாக்கவும்வலம்
வருகின்றன
அதிகாரத்தின் கண்கள் உங்களை உற்று நோக்குவது
உங்களுக்கு தெரியாது அது உங்கள்
மென்னியை பிடிக்கும் வரை
மெல்ல மெல்ல அனைத்தையும் நீங்கள்
இழந்து விட்ட பின்னும் உங்கள் குரல்வளை பிடித்து
இனி இறுகும் அதிகாரத்தின் கைகள்

உன் வீடு

நேற்று பெய்த மழையில்
நசநசத்து போயிறுக்கும்
நீ இல்லாத உன்
வீட்டைதேடி தவித்த
என்காலடித் தடங்கள்.